Sentiero Gemina - Primo tentativo

Come promesso volevo recensir el Sentiero Gemina tratto de l'antica via che duemila anni fa collegava Aquileia con Lubiana e adesso collega non solo le osmize, le trattorie e i agriturismi dei comuni carsici de Aurisina e Sgonico, ma anche diversi punti de interesse storico e naturalistico come castellieri e grotte. Inutile che scrivo qua informazioni che podè trovar de altre parti: ecco quindi la pagina de Wikipedia che parla de la Via Gemina, el sito de la provincia e la traccia gps del percorso, che comunque xe segnado sulla mappa Transalpina n.2.

Ecco che riva el delfin!

El ritrovo xè al parchetto sotto al Dopolavoro ferroviario de Roian, non la solita Ponziana, quindi. Xe l'occasion per lassar ferma l'auto e sfruttar un servizio che dovessi esser più usado e potenziado, almeno de Monfalcon a Citanova: el Delfino Verde, el vaporetto de la Trieste Trasporti.

Dal molo prima del circlo velico de Muja, in meza ora se riva in stazion marittima, di fronte de la Costa Classica. El prezzo per la bici xe 0,80€ e quel per persona varia a seconda delle modalità de pagamento dai 3 ai 0,50€ a corsa: orari e prezzi ovviamente sul sito.
Ocio che sul vapor ghe pol montar solo due bici per volta!

Castel e campanil de Muja visti dal molo

Savevimo che la mancanza de tempo jera un problema fin de l'inizio, quindi semo andai su per strada del Friuli anche se la xe ssai trafficada. La descrizion completa del giro la go za fatta su Wikiloc e no stago qua a ripeterla.

In generale xe stada bastanza una delusion. Sicuramente gavemo anche organizzado mal el giro e no semo stadi bastanza attenti, ma lo stesso ghe xè tabelle ogni venti metri dove che no servi e manca inveze qualche tabella in centro dei paesini. Sotolinio che questo percorso non xe solo un itinerario per facili escursioni de osmiza in osmiza: questo tratto della Via Gemina xe anche parte della Via dell'Ambra, che de qua dopo andava verso la Via della Seta. Cossa c'entremo noi cittadini del terzo millennio in tutto questo?
La Via dell'Ambra sarà el corridoio cicloturistico Baltico-Adriatico.
In una vision più locale, manca un collegamento tra la ciclabile FVG-1, tratto regionale della Ciclovia Alpeadria, e la ciclabile della Val Rosandra e la Parenzana.

Autunno in Carso tra Gabrovizza e Sgonico
(sentiero 034)

El Carso xe aspro, sì, e no se pol gnanche passar con le ruspe per far passar i francesi e i tedeschi con le riode de strada, ma qualcossa de più e de mejo se pol far. Bisogna farlo. Una rete ciclabile del carso va fatta subito, prima per noi, e dopo per el resto del mondo.
Rendemose conto che -anche se continuemo a far finta de no vederlo- Trieste xe al centro de l'Europa e chi da Nord o da Ovest va a spender soldi a Sud e a Est dove no ghe xe più confini e le robe costa la metà, passa per de qua: i pol veder che bel posto che xe e soprattutto fermarse a dormir qualche notte; i pol anche passar più veloci possibili sulle nostre statali verso Cosina e la Croazia, perdendose particolarità stupefacenti e soprattutto lassandone pochi soldini.
Demoghe un'ociada a cossa che i fa in Slovenia, vedemo cossa che pol esser applicado al nostro territorio e fazemolo subito. Partindo dal segnalar su OpenCycleMap le strade agricole adatte come ciclabili con i nomi e tutto. Facile, immediato, gratuito e -secondi mi- efficace.
Ciclovia Alpeadria. EuroVelo: vedi corridoio 8 e 9.

Percorsi casuali dal Carso alla Ciciaria

Giovedi.

I ruderi visti dei cani

La salita de Contovello xe pittoresca ma impegnativa e el monte S. Leonardo xe sconsigliado a chi non sa a cossa sta andando in contro. La parte centrale inveze xe adatta a chiunque gabbi una mountain bike; se tratta del boschetto tra Prosecco e S. Croce e del Sentiero Gemina.

Entrambi questi percorsi meriterà un articolo specifico.

Metto qua el collegamento a Wikiloc del giro fatto, con la traccia gps, le altimetrie e la descrizion. Le foto xe de una volta che son torna' su a piedi.

Cani che varda i ruderi

Panorama dei monti dal San Leonardo: circa da NNO a ESE

Sabato.

De mattina semo ndai a far la parte centrale de la Lanaro Granfondo. De Basoviza verso Sezana per la strada bianca pianeggiante; su per el n°3 del Cai fin a Gropada, un poco fadigosa; de Gropada su pel monte dei pini e de novo zo per strade larghe. Svolta a destra per non tornar verso Gropada, ancora un tratto pacifico sul numero tre fin al km 1,6 dove le robe comincia a farse tecniche.

Mejo xe andar de Groppada per strada bianca fin a Trebician e de là ndar su verso Orlek passando per dove che finissi la registrazion. Noi semo andai ancora avanti per n°3 fin Ferneti ma no jera facile. De là verso Orlek per un tratturo che Open Cycle Map non segna completamente. Se attraversa Orlek e se ciapa un altro tratturo -quel più a nord sulla mappa OCM- che riporta de novo alla strada imperiale: robe de mountainbike tranquilla.

Nei pressi de Lipiza

Ne vanzava tempo e inveze de tornar subito indrìo semo andai verso Lipiza, ciapando l'anel vizin al Golf Lipica: vardar ma OCM perché le Tabacco no segna quei sentieri. L'anel xe una pasegiata de allenamento per i cavai -tabellada- e per raggiungerlo se fa un sentierin stretto e leggermente angusto che risulta veloce ma non spensierato, quindi ssai divertente. Sempre abbastanza pianeggiante, comunque. De Lipiza a l'imperiale se semo fatti accompagnar de due ciclisti che coreva come danai e no go riva' a star 'tento a la strada. Credo comunque che se tratti del sentier più grosso che sulla mappa OCM diventa anche blu (ciclabile). Finalmente a Basoviza.

Metto giusto el gps della parte coincidente col percorso de la gara.

De dopopranzo semo ndai coi cani soto al Cocusso partindo dal cimitero de Lokev. Xe bei tratturi larghi tra boschi, prati e muretti e no ghe son mai anda' in bici su quel versante. Bisognerà andarghe ma no me piasi l'idea de far la statale.

Domenica

L'altipian del Kojnik e i monti de drìo

Sempre col cagneto semo ndai sui monti di fronte al Tajan: Kolnjk e Glolič. Partenza de Podgorje (Capodistria), sentiero segnado ben fin su, senza problemi ma con fadiga fin al Kojnik. Da là se xe sul'altipian e rivar al Glolič no xe un problema. Bel sarìa andar in quei posti in bici perché xe sia saliscendi larghi e veloci che, se se va a zercarli, tratti impegnativi e tecnici. Qua el nostro giro.

Altri che ga fatto sti monti in bici: uno, due e tre.

Un tratturo verso el Golič

La zima del Golič

Post zero

Primo post de prova.

La bici e la Barcolana

L'altra domenica, giorno de la Barcolana, go voludo andar a zercar el percorso che go visto in un filmato (questo filmato). Lori i lo ciama Enduro Trail Muggia: mi no son ancora capace de farlo quindi go deviado quasi subito cercando una discesa più tranquilla, visto anche el fondo viscido -e sinceramente farme mal in bosco da solo no me par una grande idea. Fatto sta che me farò portar de gente che sa più de mi e in ogni caso sarìa de valorizzar e segnalar questo e altri percorsi, anche riservandoli alle bici, se xe el caso: tanto se tratteria de un sentier ogni dieci e insomma.. la sicurezza eccetera.