Indice: Chi son mi, Cossa xe sta roba, Le fonti, Della lingua.
Chi son mi?
Non che gabbi tanta importanza. Pol esser de qualche utilità saver che vegno dal pattinaggio e dal hockey, sport dove se usa appunto i pattini come mezzo de trasporto; quindi el fattor equilibrio me lo porto ancora ancora drìo ma i pattini xe vincoladi ai piedi, no come la bici che anzi spesso me disarciona! Altro aspetto de differenza tra hockey e bici, almeno in prima aprosimazion xe sicuramente el lavor fisico richiesto -scatti brevi e ravicinadi contro resistenza a la lunga distanza- e el lavor mentale che distingui i sport de squadra, de situazion, de reazion immediata, da quei atletici, lineari, de gestion de la gara. Segnada la linia de confin, no resta che oltrepasarla clandestinamente quando su un percorso se incontra piere, busi, tronchi, salti, curve, giarina, bagna', vento, piova, caprioli, lepri, moschini che costringi i miei riflessi a star ancora più vigili che in campo e le mie reazioni più pronte e adeguate, se no se vol appunto esser disarcionadi o cromarse i ginoci.
Insoma essendo i miei impegni hockeistici ridotti rispetto ai altri anni, go voludo zercar altre attività de praticar in maniera amatoriale: caminar go prova' ma dopo un poco stufa, soprattutto se el tempo a disposizion xe poco e se vedi sempre i stessi posti se no se dopra l'auto; corer no go gnanche prova', no son bon; altri sport de squadra jera in orari che gavevo za ocupai.. bici!
Me jero za compra' una bici un anno prima ma la usavo soprattutto su asfalto o strade bianche, un poco anche come mezzo de trasporto vero e proprio; sta estate inveze un altro se ga compra' la bici e me ga presenta' un terzo che za andava de anni.. e ciò sto qua ga incomincia' a portarne per salti e pieroni e se tutto va ben una volta per settimana zerchemo de farse el giretto. In tre però xe un poco dura: basta un che manchi e a i altri due ghe passa za un poco la voja; certo che un podessi ndar in bici anche solo... ma no xe la stessa roba! -e sto lato collettivo nel sport individuale xe una de le robe che più me ga colpido. In più spesso in jugo xe biciclettade più o -solitamente- meno compeditive a cui mi volessi partecipar e sti due mati schifa regolarmente :-(
Cossa xe sta roba?
Questo sito xe appunto la version virtuale del mio rapporto con la bici: una raccolta inanzituto de tutti i eventi che podessi esser a la mia portata in posti de mi ragiungibili; dopo xe una sezion musicale, altro lato secondo mi importante; ovviamente ghe xe la parte diario, con descrizion, foto, video dei giretti. In un modo o in un altro volessi che anche altre persone segnali eventi, posti, canzoni, che metti foto e filmini, che se meti d'acordo per ndar fora in clapa.
Sì, ma perche?!
Internet xe pien, stracolmo de informazioni. Xe talmente tante informazioni che no se riva a tignir el conto e qualche volta quele che ne scampa xe quele che volessimo saver più volentieri. In questa situazion un sito che raccogli le informazioni per genere comincia a esser utile, soprattutto nel nostro continente -in particolare qua nei paraggi- dove parlemo e soprattutto scrivemo in una miriade de lingue e se ghe domandemo a Google de zercar "pista ciclabile" no podemo gnanche lamentarse se no'l trova i siti che parla de "Fahrradweg" o de "kolesarska pot".
Esisti sei (SEI! ---> 6) siti de bici solo a Trieste, uno per ogni associazion. E che problema xe? El problema xe che per saver se a Trieste xe qualche evento ligado a le bici xe de vardar sei siti diversi, ogni settimana, col ris'cio comunque de vederse sfilar la bicicletada soto casa senza gaver savudo gnente. I siti sloveni e croati se comporta un poco mejo ma xe de tignir in conto che spesso ogni sagra ga una gita o una corsa in programma e xe dificile che anche lori rivi a starghe drìo a tutti sti eventi. Quindi, se mi vado comunque in giro per sti siti a zercar garette, almeno li meto qua che cussì chi che vien dopo li trova pronti. Un altro fatto xe che se un percorso xe promosso da un ente turistico, xe logico che i scriverà che xe tutto bel, intela natura, tra i frutteti, sempre col sol; qua se pol magari scriver esattamente come xe el fondo del sentier, la situazion del traffico, l'organizzazion, el magnar.
In giro ghe xe veramente eventi per ogni esigenza e uno dei obiettivi de sto sito xe formar dei gruppi che possi condivider la macchina e andar insieme a far le gitine senza andar ognidun per sé.
Questo sito vol anche dimostrar che se pol gaver sodisfazion e divertimento anche senza comprar 1000€ de bici, esser sempre super esaltadi, senza pensar che se no te son un stra-forte che fa i salti mortali pei alberi a nissun ghe interesserà niente del tuo video o de le tue foto. Certo, no xe gnanche de farghe un inno a la mediocrità.
Le fonti.
Nella colonna a destra xe un elenco de collegamenti a vari siti de ciclismo che seguo.
Istriabike xe in sostanza la sezion ciclistica de Colours of Istria, cioè l'ente turistico de l'Istria nordoccidentale: Umago, Cittanova, Buje e Verteneglio. I proponi diverse biciclettade non competitive su tracciati spesso cicloturistici tipo la Parenzana, solitamente ligade a sagre paesane e temi rurali.
El Gruppo Vulkan xe la sezion ciclistica de la Società Alpina delle Giulie, el Cai storico de Trieste. Organizzatori de diverse garette non competitive, in particolare la Lanaro Granfondo dove più che i avversarii se sfida el gennaio carsico, i se trova ogni sabato mattina a Basovizza per i giretti regolari.
Rekreacija raccogli tutte le informazioni sportive de Slovenia, tra cui i vari tipi de ciclismo. Chiaramente tanti eventi risulta lontanucci.
KraskiMarathon xe el sito sportivo del Carso sloven: Merna, Komen, Sezana, Divaccia, Kozina. I organizza robe soprattutto in primavera e autunno e la biciclettada per la festa de teran de del parsuto a Dutoglie, in agosto.
360mtb xe un'associazion sportiva e un negozio. Specializzadi in downhill, enduro e crosscountry, i fa corsi per fioi e adulti. I organizza la Enduro dei tre camini, gara competitiva seria.
Ulisse xe un'associazion de cicloturismo e ciclismo urbano, attivi per i diritti del ciclista su le strade e per la mobilità sostenibile.
Cottur xe sia un negozio che un'associazion sportiva ma no so se le due robe c'entra ssai. I fa la gara sul circuito de crosscountry de Prosecco.
Menzione speciale per la Spiz, associazione di promozione sociale che organizza la Rampigada Santa, volendo un attimo scasar le coscienze e i culi dei triestini sentadi sul dilagante nosepolismo.
Altri siti xe stadi abbandonadi dai loro creatori o xe troppo serii per gaver informazioni utili al scopo de questo sito ma i xè messi comunque per completezza.
Della lingua, ossia: Parla come che te magni!
El problema de la lingua no xe de ovvia soluzion, visto che se tratta de eventi in almeno tre paesi con varie lingue e dialetti. Intanto provemo con la soluzion Parla come che te magni: ognidun scrivi come che vol e dopo se se vien in contro con una lingua comune o con un interprete. Italian, sloven, croato, furlan, tedesco, inglese, fè voi. Mi go za incomincia' a seguir la regola :-P
Parentesi: che po' dopo -per i dialetti- xe de far el discorso de la grafia, perché xe facile dir scrivi come che te parli... in Veneto i ghe ga prova', ma go letto un testo in veneto scritto da un emigrado in Brasil che vojo veder cos'che capiva un venezian... idem per el triestin-istroveneto, che xe sempre dialetti veneti: le regole ortografiche del veneto standard no xe quasi mai rispettade qua de noi, e i istriani spesso rendi i suoni con la grafia croata (tanto più regolare de quela italiana, bisogna dir, e certe volte più attinente a la nostra vera pronuncia).
IMPORTANTE: i nomi dei eventi sarà scritti nella lingua dell'ente organizador o nella lingua usada nell'articolo. Esempio: "S kolesom na teran in pršut" pol tranquillamente diventar "In bici per teran e parsuto" o "Biciclettata del terrano e del prosciutto" o "Mit dem Fahrrad zum Teran und Schinken" o cossa so mi. In certi casi i organizadori stessi usa più lingue, metti in zone bilingui o con un ufficio turistico internazionalista; in altri casi bisogna rangiarse, quindi rivar a capir almeno quel tanto che basta. Magari in futuro faremo un dizionario multilingue del sito.
Ah, sì: CERCASI TRADUTTORI!
Nessun commento:
Posta un commento